Во моментов е во тек оперативна акција предводена од јавен обвинител од Специјализираниот сектор за полициски службеници, објавија од Јавното обвинителство за гонење на организиран криминал и корупција (ЈО ГОКК).
Според информациите што ги пренесуваат медиумите во Кочани и Штип, вечерва се уапсени 13 лица, меѓу кои и шефови и полицајци кои биле на должност вечерта кога избувна пожарот во дискотеката „Пулс“ во Кочани.
Меѓу приведените се Т.Д. (раководител на криминалистичката полиција), Д.П. (координатор на смена во текот на ноќта на трагедијата), М.М. (шеф на Полициската станица Кочани), К.Ј. (раководител на економски криминал во рамките на ПС Кочани), како и М.Р. (полицаец кој бил на работа вечерта на инцидентот). Во пожарот во дискотеката „Пулс“ во Кочани, кој се случи во текот на ноќта на 16-ти март, загинаа 62 лица, а околу 200 беа повредени.
Од Обвинителството најавија дека официјално соопштение ќе биде објавено во текот на денешниот ден.
