Според извештајот на „Фајненшл тајмс“ (ФТ), Кина планира повторно да го отвори својот пазар на обврзници за водечките руски енергетски фирми, со што би се означил нов стадиум на зближување меѓу двете држави, како на економски, така и на политички план.
За време на состанок одржан кон крајот на август во Гуангжу, кинеските регулатори им пренеле на руските енергетски претставници дека ќе го асистираат издавањето на таканаречени “панда обврзници”, кои се номинирани во јуани, пренесува весникот, цитирајќи неименувани извори. Овие обврзници ги издава странска фирма или држава, но нивната емисија се извршува во Кина.
Тие се деноминирани во јуани, што подразбира дека инвеститорите во Кина – банки, фондови и осигурителни компании – не се соочуваат со валутен ризик.
Доколку овој план биде реализиран, тоа ќе претставува прво прибирање на капитал од страна на руски компании во Кина од почетокот на војната во Украина во 2022 година.
Последното слично издавање датира од 2017 година, кога рускиот производител на алуминиум „Русал“ издаде обврзници во вредност од 1,5 милијарди јуани (околу 179 милиони евра).
Оваа вест доаѓа веднаш по средбата на рускиот претседател Владимир Путин и кинескиот претседател Си Џинпинг во Пекинг минатата недела. Си тогаш го нарече Путин “стар пријател” и нагласи дека односите меѓу Москва и Пекинг “го издржале тестот на променливите меѓународни околности”.
