Table of Contents
Кога користењето на телефонот почнува да го нарушува расположението, да ги потиснува вистинските искуства или да ги нарушува односите во живо, тоа е знак дека навиките преминале во нездрава зона.
Мобилните телефони и дигиталните уреди се клучен дел од секојдневието – на нив ги имаме банкарските картички, возните редови и каналите за комуникација. Сепак, кога нивното користење почнува да го нарушува расположението, да ги потиснува вистинските искуства или да влијае врз односите во живо, тоа е показател дека навиката станала нездрава, пишува „ParentMap“.
Тинејџерите се особено чувствителни
Тинејџерите се особено подложни на прекумерно користење дигитални уреди бидејќи делот од мозокот задолжен за планирање и предвидување на последиците сè уште не е целосно развиен. Истовремено, тие се особено чувствителни на процените и мислењето на врсниците.
Истражувањата покажуваат дека тинејџерите се посклони кон промени во расположението и сè уште учат како да се справуваат со неизвесноста и да ги контролираат емоциите. Поради тоа, полесно реагираат на содржини и поттикнувачи од интернет што ги вовлекуваат во круг на променливи емоции, особено кога се изложени на непрекинат прилив на информации.
Дигиталниот свет така може да стане начин за бегство од секојдневните обврски, а мобилниот телефон – главната алатка за справување со предизвиците.
Знаци што укажуваат на проблем
Постојат јасни знаци дека користењето на уредите станало проблем. Еден од нив е исполнувањето на секој слободен момент со скролање или проверување на апликациите, при што уредот станува главниот одговор на стресот или досадата.
Проблемот е очигледен и кога детето е отсутно за време на разговор и автоматски посегнува по телефонот, што покажува дека директната комуникација сè повеќе го губи значењето.
Трет показател е постојаното одложување на важните обврски, како учењето, пишувањето домашни задачи и домашните задолженија.
На крајот, постојаниот замор исто така може да биде последица од прекумерното користење на уредите, бидејќи тинејџерите често остануваат будни до доцна во ноќта, скролајќи или дружејќи се на интернет.
Како се создава зависничката привлечност?
Уредите можат да создадат нешто што се нарекува „зависничка привлечност“. Процесот започнува со непредвидливи известувања, како лајкови, пораки или награди во видеоигрите.
Поврзани објави
Бидејќи некои од овие награди се позитивни, додека други се неутрални или ја намалуваат вознемиреноста, се создава силен круг поттикнат од допаминот.
Со текот на времето, самиот уред станува условен поттик, па доволен е поглед кон маската на телефонот или светлото на екранот за да се појави желба да се провери. Лицето посегнува по телефонот со надеж дека ќе добие награда или ќе ја ублажи загриженоста.
Тоа може да создаде и круг на вознемиреност, во кој лицето го проверува телефонот дури и кога нема известувања и чувствува само краткотрајно олеснување.
Со повторувањето на овој циклус се засилува загриженоста и се создава емоционална зависност. На таквата „зависничка привлечност“ тешко е да ѝ се одолее.
Со текот на времето, навиките се поврзуваат и со просторот во кој се користат уредите, како што е спалната соба. Потребата постојано да се проверува телефонот е резултат на процес на условување, а не на недостиг од волја.
Родителите се пример за однесување
Не може да се очекува децата да им се спротивстават на дигиталните навики ако тоа не го прават ниту возрасните околу нив. Родителите можат да бидат пример за посвесно користење на уредите. Важно е да ја препознаат напнатоста што ги тера веднаш да посегнат по телефонот кога се загрижени. Добра навика е, кога ќе влезете дома, да го оставите телефонот или паметниот часовник на место што не ви е на дофат.
Уредите не треба да се чуваат во близина за време на периодот наменет за семејството. Корисен може да биде и договорот апликациите што поттикнуваат бесконечно користење да се инсталираат само на еден уред по член на семејството.
На пример, постар тинејџер може да има Тик-ток на таблет, но не и на мобилниот телефон, а таблетот би требало да се користи исклучиво во заедничка просторија, надвор од спалната соба.
Вистинската слика за навиките на сите членови на семејството најдобро ја покажуваат извештаите за времето поминато пред екраните.
Иако овие податоци можат да бидат непријатни, наместо семејството да се помири со таквиот начин на живот и неговото влијание врз вниманието и расположението, сите заедно можат да се обврзат на мали, но важни промени.
Фото: Freepik
