Конзервативната партија Браќа на Италија, предводена од премиерката Џорџа Мелони, достави нацрт-закон со кој се предлага ограничување на носењето бурка или никаб на јавни места, како и присилните венчавки помеѓу муслиманите и финансирањето на џамиите.
Предложената регулатива претставува сегмент од борбата против исламскиот сепаратизам, со цел да се избегне формирање на „контраопштество“ во Италија, каде што државните закони би биле потиснати или заменети со шеријатското право.
За оние кои нема да ги почитуваат одредбите, предлог-законот предвидува парични санкции во висина од 300 до 3.000 евра за прекршување на забраната за носење бурка или никаб на јавни простори, како што се образовни институции, универзитети, продавници и државни институции.
Членот 5 од предлог-законот прецизира дека е забрането носење облека што го прикрива лицето, како и било кој друг предмет што ја отежнува идентификацијата на поединецот на јавни локации и простори отворени за јавноста.
Сара Келани, пратеничка од партијата Браќа на Италија, потенцираше дека целта на законот не е само да се забрани бурката, туку и да се спречи создавање паралелни општества во Италија во кои не се почитуваат италијанските закони. Таа изјави: “За жал, сведоци сме на бројни феномени од ваков вид и во Италија, и токму во ова контраопштество цвета исламскиот фундаментализам.”
Бурката претставува облека која целосно ја покрива жената од глава до пети, вклучувајќи го и превезот преку лицето. Никабот, пак, е превез за лице со отвор за очите. Франција беше првата држава која воведе ваква забрана во 2011 година.
Оттогаш, листата значително се прошири, опфаќајќи повеќе од 20 земји ширум светот, меѓу кои и Австрија, Тунис, Турција, Шри Ланка и Швајцарија. Европскиот суд за човекови права континуирано ги поддржува овие забрани. Освен забраната на бурката, предлог-законот го регулира и прашањето за принудните бракови.
Заменик-министерот за правда, Андреа Делмастро, подвлече дека законот се занимава и со прашањето за принудните бракови, за кои рече дека се “уште еден сериозен проблем”.
Во предлог-законот се нагласува дека во Италија мора да се имплементираат закони засновани на западните вредности.
Делмастро додаде: “Од договорени бракови до случаи како Саман, разликата е многу мала”, алудирајќи на убиството на 18-годишната Пакистанка, Саман Абас. Таа била убиена од нејзините родители поради нејзиното одбивање да замине во Пакистан и да се согласи на договорен брак. Нејзиното тело било пронајдено во напуштена фарма во близина на полињата каде што работел нејзиниот татко во северна Италија. Италијански суд ги осуди нејзините родители на доживотен затвор.
ми/фото: МИА архива.
Извор: МИА
