ЕУ сака да стапи во контакт со новата влада во Сирија на оперативно – не на политичко ниво

Европската унија (ЕУ) сака наскоро да стапи во контакт со новите власти во Сирија, на „оперативно, а не на политичко“ ниво, изјави денеска неименуван висок европски функционер.

„Размислуваме за воспоставување контакти… Тие контакти ќе бидат на оперативно ниво и се надеваме дека тоа ќе се случи наскоро“, рече претставникот, кој сакаше да остане анонимен.

Тие контакти нема да се случат „на политичко ниво, и не на ниво на високи функционери“, рече претставникот, додавајќи дека ЕУ има вршител на работите за Сирија, со седиште во Бејрут.

По 11-дневна офанзива, бунтовничката коалиција предводена од радикалната сунитска исламистичка група Хајат Тахрир ал-Шам го зазеде Дамаск на 8 декември, ставајќи крај на половина век владеење на семејството Асад. ЕУ, чии министри за надворешни работи се состануваат во понеделник во Брисел, сака да „испрати пораки“ до новите сириски власти, особено за почитување на малцинствата, човековите права и територијалниот интегритет на земјата, повтори денеска европски функционер.