Ердоган на посета кај Орбан

Фото: EPA-EFE/SZILARD KOSZTICSAK
Турскиот претседател Реџеп Таип Ердоган денеска е во посета на Унгарија на покана на унгарскиот премиер Виктор Орбан, јави унгарската новинска агенција МТИ. Лидерите на двете земји ќе се сретнат во кабинетот на Орбан, а теми на разговор ќе бидат безбедноста, одбранбената индустрија и економските прашања, најави портпаролот на премиерот.Тој ќе се занимава и со подготовките за следниот состанок на високо ниво на Унгарско-турскиот совет за стратешка соработка, кој ќе се одржи на крајот на годинава.

Унгарија и Турција се единствените членки на 31-та НАТО алијанса кои се уште ги немаат ратификувано протоколите за прием на Шведска во алијансата, а не е јасно дали тоа ќе биде една од темите на разговор за време на посетата на Ердоган, пишува словенечката агенција СТА.На јулскиот самит на алијансата во Вилнус, турскиот претседател изјави дека Турција наесен ќе ги ратификува шведските пристапни протоколи, што според унгарскиот портал Телекс ја изненадило политичката елита во Будимпешта.

Веќе следниот ден шефот на унгарската дипломатија Петер Сијарто изјави дека унгарската ратификација на приемот на Шведска во НАТО по завршувањето на турската блокада е „чисто техничко прашање“. Ердоган последен пат беше во Будимпешта во ноември 2019 година, а во последните неколку години во неколку наврати се сретна со Орбан.

Унгарскиот премиер присуствуваше на инаугурацијата на Ердоган откако турскиот претседател доби нов петгодишен мандат на изборите на крајот на мај. Викендов во посета на Унгарија е и српскиот претседател Александар Вучиќ, а се предвидува дека в недела ќе се сретне одделно со Орбан и Ердоган, јави СТА.Танјуг пишува дека претседателот на Република Српска Милорад Додик, кој е во Унгарија со Вучиќ и српската членка на Претседателството на Босна и Херцеговина Жељка Цвијановиќ, ќе се сретне со Орбан по повод унгарскиот национален ден и отворањето на Светското првенство. во атлетика во Будимпешта.