Истражување спроведено меѓу повеќе од 1.600 пациенти открива кои пет здравствени состојби предизвикуваат најинтензивна болка. На првото место е состојба што многумина погрешно ја сметаат за обична главоболка или воспаление на синусите.
Постојат болки што тешко можат да се опишат со зборови, но една од нив според пациентите е дури и поболна од породувањето, воспалението на панкреасот и бубрежните камења. Станува збор за кластер-главоболка, која се смета за една од најинтензивните форми на болка што човек може да ги доживее.
Истражување предводено од неврологот Марк Буриш, објавено во 2020 година во научното списание „Headache“, опфатило 1.604 лица кои страдаат од оваа состојба. Учесниците ја оценувале болката на скала од 0 до 10, а оние што имале искуство и со други болни состојби ги оценувале и нив.
Дури 72,1 отсто од испитаниците ѝ ја доделиле највисоката оценка на кластер-главоболката.
Ова се петте најинтензивни болки според резултатите од истражувањето:
1. Кластер-главоболка – 9,7/10
Убедливо на првото место е кластер-главоболката. Најчесто се јавува на едната страна од главата, особено околу едното око. Нападот може да трае до три часа, а во текот на денот може да се повтори неколкупати. Карактеристични се и солзењето на окото и течењето на носот, поради што понекогаш погрешно се дијагностицира како воспаление на синусите.
2. Породилни болки – 7,2/10
На второто место се породилните болки. Оваа оценка ја дале 308 испитанички кои се породиле, а истовремено страдаат и од кластер-главоболка.
Поврзани објави
3. Акутно воспаление на панкреасот – 7,0/10
Третото место му припаѓа на акутниот панкреатитис, состојба што предизвикува силна болка во горниот дел од стомакот, често проследена со мачнина и повраќање.
4. Бубрежни камења – 6,9/10
Бубрежната колика се јавува кога каменот се придвижува од бубрегот и поминува низ уринарните канали. Испитаниците ја оцениле со 6,9 од 10.
5. Жолчни камења – 6,3/10
На петтото место се жолчните камења, со просечна оценка 6,3. Меѓу другите состојби што не влегле во првите пет се прострелните рани и дискус-хернијата.
Истражувачите предупредуваат дека резултатите не претставуваат конечна и универзална листа на најсилните болки. Учесниците се потсетувале на претходни искуства, па нивните оценки можеби не ја одразуваат целосно вистинската јачина на болката во моментот кога ја доживеале. Дополнително, другите болни состојби биле оценувани од лица кои веќе страдаат од кластер-главоболка. Сепак, резултатите откриваат колку екстремна може да биде оваа состојба и зошто нејзиното навремено препознавање и правилно дијагностицирање се особено важни.
Фото: Pexels
