Во врска со неодамнешните настани, Државната комисија денес преку јавно известување ги заверува граѓаните, соработниците и меѓународната заедница дека институцијата останува целосно посветена на почитувањето на начелата на чесност, отвореност и правна држава.
“Државната комисија како институција продолжува да работи независно и ефикасно, во согласност со своите законски надлежности и својот мандат.”
Комисијата продолжува да ги извршува своите редовни активности и должности, а нејзината цел за спречување и сузбивање на корупцијата на сите нивоа останува непроменета и посилна од кога било, се наведува во објавата од ДКСК.
Од Државната комисија потврдуваат дека дејствијата за утврдување лична одговорност не ја поткопуваат институционалната и колективната заложба.
“Свесни сме за важноста и значењето на довербата од јавноста. Затоа ќе продолжиме да работиме со највисока транспарентност и да соработуваме со надлежните институции, обезбедувајќи почитување на законите и највисоките етички стандарди во рамките на ДКСК”, се нагласува во соопштението од ДКСК.
Поранешната прва дама на Антикорупциската комисија, Билјана Ивановска, денес, пред одржувањето на седницата на Националната конвенција за ЕУ во РСМ посветена на борбата против корупцијата, апелираше претседателката на ДКСК веднаш да даде отказ, бидејќи на овој начин сè уште ја контаминира институцијата.
“Треба да се тргне за институцијата да може слободно да се чисти”, истакна таа.
На новинарско прашање поврзано со случајот со тековната претседателка на ДКСК, Татјана Димитровска, која минатата седмица се најде на листата осомничени во случајот „Адитив“ поради издавање доверливи информации на друг обвинет во случајот, Ивановска тврди дека несомнено е нанесен сериозен удар врз општеството, граѓаните и институцијата, нагласувајќи дека не е момент да се седи со скрстени раце.
дма/нд/Фото: МИА архива.
