Српскиот претседател го призна поразот на денешните вонредни парламентарни избори во Србија. Обраќајќи се од седиштето на изборната листа „Обединета Србија“, Вучиќ изјави дека според податоците со кои располага, Студентската листа освоила мнозинство од пратеничките места во српскиот парламент.
„Врз основа на она што го гледаме, јасно е дека ги загубивме овие избори. Студентската листа ќе има меѓу 140 и 150 мандати, а ние 105. Во парламентот влегоа и војводинските Унгарци со три мандати, како и Албанците и СДА“, изјави Вучиќ.
Според податоците што ги соопшти, неговата изборна листа освоила околу 1,72 милиони гласови, додека Студентската листа добила приближно 2,2 милиони гласови.
И покрај изборниот пораз, Вучиќ порача дека неговиот политички блок ќе продолжи да дејствува како опозиција.
„Зборуваа дека некој ќе бега и ќе ги пакува куферите. Лажеа за сè што зборуваа, од звучниот топ до ‘Сараево сафари’. Ние ќе имаме од 100 до 105 пратеници. Ќе се бориме и ќе им покажеме што значи да се биде опозиција“, порача тој.
Вонредните парламентарни избори во Србија се одржаа во атмосфера на големи политички тензии и висока излезност.
Според процените на Студентската листа, на гласање излегле 69,1 процент од избирачите, без гласовите од дијаспората.
Право на глас имаа 6.451.292 граѓани, кои можеа да гласаат на 8.392 избирачки места, вклучително и 93 во странство.
Изборниот ден беше проследен со повеќе инциденти и физички пресметки во различни делови од земјата. Во Белград полицијата го блокираше центарот на градот, додека во близина на Пионирскиот парк беше забележано собирање на стотици маскирани лица.
Изборите беа распишани по повеќемесечните антивладини протести, поттикнати од трагедијата во Нови Сад на 1 ноември 2024 година, кога при уривање на настрешницата на железничката станица загинаа 16 лица.
Студентските и граѓанските протести прераснаа во широко движење кое бараше одговорност за трагедијата, борба против корупцијата и промени во управувањето со државата.
Со резултатите што ги соопшти Вучиќ, се отвора можноста Студентската листа да формира ново парламентарно мнозинство, додека неговиот политички блок би преминал во опозиција.
Изјавата на Вучиќ дека ги загубиле изборите сега е потврдена и од српскиот „Блиц“, кој известува за неговото обраќање од изборниот штаб на листата „Александар Вучиќ – Обединета Србија“. Според „Блиц“, Вучиќ нагласил дека оваа процена се темели на стратификуван изборен примерок, а не на конечни резултати.
Post Views: 110
