Состојбата со пациентите во Гостивар во последните 24 часа е значително помирна, а бројот на лица кои побарале медицинска помош поради стомачни тегоби е во опаѓање. Во болницата и натаму има пациенти со симптоми како болки во стомакот, дијареја и општа слабост, но најголем дел по прегледот биле пуштени на домашно лекување.
Според податоците од гостиварската болница, медицинска помош на инфективното одделение побарале 11 пациенти, додека на педијатрија биле прегледани 14 деца. По направените прегледи, најголем дел од нив биле упатени на домашно лекување.
Во моментов на инфективното одделение се хоспитализирани двајца пациенти. Од болницата информираат дека нивната состојба е стабилна и дека се очекува да останат на болничко лекување уште неколку дена, по што би требало да бидат пуштени дома.
Директорот на гостиварската болница, Емри Бајрами, за ТВ21 изјави дека актуелниот број на пациенти не отстапува значително од вообичаените бројки за овој период од годината.
Според него, намалувањето на бројот на лица со стомачни симптоми покажува дека состојбата постепено се стабилизира. Бајрами посочи и дека дел од случаите може да бидат поврзани со сезонски вирусни инфекции, имајќи предвид дека слични здравствени проблеми се регистрираат и во други години во летниот период.
И покрај подобрувањето на состојбата, здравствените и надлежните институции продолжуваат со мониторингот на водоснабдувањето во Гостивар. Се врши редовно земање примероци од водата и нивно лабораториско испитување.
Препораките за користење на водата остануваат на сила сè до добивање на потврда дека таа е безбедна за пиење. Според досегашните најави, потребно е да бидат добиени негативни резултати за присуство на бактерии во три последователни контроли, по што би можело да следи одлука за повторно безбедно користење на водата за консумирање.
Иако бројот на пациенти е намален, состојбата на криза во Гостивар сè уште трае, а институциите продолжуваат да ја следат здравствената состојба на населението и квалитетот на водата.
