Бајден од Големиот Кањон ќе говори за климатските промени

Американскиот претседател Џо Бајден денеска оди во западниот дел на САД за да ја промовира својата еколошка политика, а прво ќе застане на едно од најспектакуларните природни места во светот, Големиот Кањон.

Според неколку американски медиуми, Бајден во таа прилика би можел да најави формирање на огромна заштитена област околу тоа место, каде пред сѐ би било забрането екстракција на ураниум. Оваа одлука ќе ги реши грижите на домородците во регионот.

Американскиот претседател утре ќе престојува во Аризона, а во среда ќе отпатува за Ново Мексико, две држави богати со природни чуда, но и особено погодени од неодамнешните екстремни топлотни бранови. Потоа, во четврток, тој ќе се упати во Јута, на патување посветено на програмите за ветерани.

80-годишниот демократ, кој сака да се кандидира за уште еден претседателски мандат следната година, има намера „да ги прикаже историските инвестиции на неговата администрација во заштитата на климата, заштитата на природните живеалишта и чистата енергија“, велат од Белата куќа.

Џо Бајден редовно ги нарекува климатските промени „егзистенцијална закана“, критикувајќи ги оние од републиканската опозиција кои ги доведуваат во прашање.

Покрај заштитата на климата, Бајден ќе се обиде да ја зајакне својата кандидатура за реизбор за време на неговата посета на три западни американски држави со истакнување на неодамнешните економски успеси и неговите достигнувања во финансирањето на нови инфраструктурни проекти.

Стратегијата на Бајден за новиот мандат е фокусирана на едукација на американската јавност за моќта на економијата и како неговата законодавна агенда ги менува нивните животи.

Американската економија ги надмина предупредувањата за рецесија, има рекордно ниска стапка на невработеност, раст на платите и подобар од очекуваниот раст на БДП, пишува Ројтерс.