Следните Европски младински олимписки игри ќе се одржат во Скопје во 2025 година, информира градоначалничката Арсовска која заедно со делегација од МОК го презема знамето на ЕОК во Словенија.
-Во Марибор, Словенија, со делегација од Град Скопје и МОК го превземавме знамето на Европскиот олимписки комитет, како симбол на преземање на организацијата на следните Европски младински олимписки игри кои ќе се одржат во Скопје 2025 година.
Честа е голема што Скопје во 2025 година ќе биде домаќин на ваков голем и престижен спортски настан. Одржувањето на младинската олимпијада во Скопје е одлична можност за афирмација на нашиот град како спортско-туристичка дестинација, а ние уште еднаш ќе се покажеме како одлични домаќини. Организацијата на настанот е и одлична можност со поддршка на ЕУ да инвестираме во подобрување на нашите капацитети и инфраструктурата со што ќе ги подобриме условите за спортување на младите генерации успешни спортисти.
Европските Младински Олимписки Игри првпат се одржаа во Брисел во 1991 година, а Скопје во 2025 година ќе биде домаќин на 25-те Европски Младински Олимписки Игри, на кои се очекува да учествуваат повеќе од 4.000 млади спортисти од 50 европски држави, кои ќе се натпреваруваат во 12 олимписки спортови. – напиша Арсовска на Фејсбук.
