Голема група германски граѓани американскиот претседател Доналд Трамп го сметаат за опасност по Германија, покажаа резултатите од истражување спроведено од Институтот ИНСА, по нарачка на популарниот дневен весник „Билд“, објавено денеска.
Според извештајот на ДПА, само 24% од учесниците во анкетата изјавиле дека Трамп го гледаат како партнер, додека импресивни 61% го означиле американскиот претседател како закана за државата.
Во репрезентативното истражување, во кое учествувале околу 1.000 испитаници, 15% од нив не дале одговор на ова прашање.
Анкетата, исто така, откри дека Германците сакаат владата на канцеларот Фридрих Мерц да заземе посилен став кон Вашингтон. Така, 52% се залагаат за построг пристап, додека 31% сметаат дека соработката е правилниот пат.
Истражувањето е спроведено во четврток и петок, во период на високи тензии меѓу Европа и САД поради спорот околу Гренланд.
Трамп од тогаш ја повлече својата закана за воведување царини на осум европски земји, меѓу кои и Германија, поради неговото барање за контрола на САД врз арктичка територија управувана од Данска.
