Министерот за здравство, Азир Алиу, заедно со неговиот заменик, Јовица Андовски, ги пречекаа присутните на свеченото отворање на 27-та Синдикална школа на Самостојниот синдикат за здравство, фармација и социјална заштита, како што соопштија од Министерството за здравство.
Во своето обраќање, министерот Алиу истакна: “Во рекордно време реализиравме над 1,250 вработувања во 85 јавни здравствени установи низ државата, како дел од стратешкиот процес на кадровско зајакнување на здравствениот систем. Паралелно го спроведуваме и процесот за вработување на приватните специјализанти, со кој решаваме децениски егзистенцијален проблем на оваа категорија здравствени работници.” Тој додаде дека “Самостојниот синдикат за здравство, фармација и социјална заштита е наш партнер со кој со заеднички заложби работиме на унапредување на статусот на секој здравствен работник во државата.”
Министерот Алиу исто така напомена дека Владата реализирала значајно покачување на платите на здравствените работници, во износ од 4,815 денари нето за сите, а за медицинските сестри ова зголемување достигнува дури 6,200 денари. Според него, “Оваа мерка значи суштинско вреднување на трудот на медицинскиот персонал.”
Заменик министерот Андовски во своето излагање потенцираше дека Министерството за здравство е отворено за дијалог и соработка со синдикатот. “Го почитуваме достоинството на докторите и целиот персонал кои се чувари на здравјето на граѓаните. Министерството за здравство е отворено за соработка со синдикатот и заеднички продолжуваме да ги решаваме сите отворени прашања и предизвици, со цел да излезаме во пресрет на здравствените работници и секако на пациентите”, рече Андовски.
Извор: МИА
