Шефицата на Делегацијата на ПАБСЕК во Собранието на Република Северна Македонија, Благица Ласовска, учествуваше на Меѓународниот форум на Парламентарното собрание на Организацијата за Црноморската економска соработка (ПАБСЕК), која се одржа на 28 и 29 септември 2024 година, во Ризе, Република Турција. На настанот присуствуваа учесници од парламенти на земјите членки на ПАБСЕК, високи државни претставници, универзитетски професори и претставници на ПАБСЕК.
На отворањето на Форумот виртуелно обраќање имаше претседателот на Република Турција,Таип Ердоган. Во текот на состанокот, свои излагања имаа и: Асаф Хаџиев, генерален секретар на ПАБСЕК; Фатих Донмез, заменик-претседател на ПАБСЕК; Инсан Селим Бајдаш, градоначалник на Ризе и други. Учесниците имаа можност да разменат мислења и продискутираат за прашања поврзани со темата на Форумот: Логистика и транспорт во Црноморскиот регион.
Во овој контекст, особено беше потенцирана важноста на ПАБСЕК дека како парламентарна компонента на Црноморската економска соработка, ги зближува претставниците на националните парламенти на земјите членки при јакнење на партнерството во Регионот, со неговата работа ја истакнува важноста на добрите односи на билатерален и мултилатерален план.
30.9.2024
