Соединетите Американски Држави го запленија авионот на претседателот на Венецуела Николас Мадуро откако било утврдено дека со купувањето на конкретниот авион, наводно, биле прекршени американските санкции, пренесува Си-ен-ен.
Како што пренесува американската телевизија, авионот е запленет во Доминиканската Република, а двајца неименувани американски функционери кажале дека тој денес бил префрлен на Флорида.
Заплената на авионот претставува ескалација во прилично ладните односи на Венецуела и САД, кои го оспоруваат резултатот на неодамнешните избори во Венецуела на кои Мадуро освои нов мандат.
Министерството за правда на САД во март 2020 ги обвини Мадуро и 14 други сегашни и поранешни венецуелски функционери за „нарко-тероризам, трговија со дрога и корупција“, наведува Си-ен-ен.
„Заплена на авион на шеф на странска држава досега не е видена во кривичните прашања. Тука праќаме јасна порака дека никој не е над законот, никој не е надвор од досегот на американските санкции“, кажал неименуван функционер за Си-ен-ен.
Авионот, чија вредност се проценува на околу 13 милиони долари, се наоѓал во Доминиканска Република во последните месеци. Венецуела ги суспендираше комерцијалните летови од и кон Доминиканска Република по неодамнешните избори.
Еден од неименуваните соговорници на Си-ен-ен кажал дека американските власти „тесно соработувале со Доминиканска Република“ при заплената, и дека Санто Доминго го известил Каракас за развојот на настаните.
Post Views:
72
Извор : vesnik-ilinden.com
САД го запленија авионот на претседателот на Венецуела Николас Мадуро (ВИДЕО)
