На прашањата на читателите одговара клиничкиот психолог Олег Сергеевич Дорофеев.
„Мојот син заврши на Факултетот за технички науки. Студиите беа самофинансирани и, додека траеја, јас и сопругот ги презедовме трошоците на себе, а синот учеше. Не покажуваше голем ентузијазам, но сè правеше навреме, бидејќи му се допаѓаше студентскиот живот. Кога ја доби дипломата во раце, јас и мојот сопруг бевме многу среќни поради тоа.
Меѓутоа, Игор отиде во една фирма, во друга, во трета… Овде не му одговараше платата, онде работното време, во третата бараа работно искуство… На крајот тој, едноставно, седна на компјутерот дома и изјави дека не сака да се занимава со професијата за ситни пари. Повеќе сака креативност, поточно графички дизајн.
На сите наши убедувања дека треба да се обиде, а дека со текот на времето сѐ ќе се среди, преовладеаја неговиот инает и разни изговори. Не би рекла дека е мрзелив, сака да работи, но засега таква е ситуацијата. Што би нѐ советувале?“
Соња
Се верува дека учењето треба да го поттикне развојот. Вашиот син не сака да се развива во областа во која стекнал одредено количество знаење. Не е важно дали тоа е поради негова инфантилност, негова желба да добие сè одеднаш или вистински недостиг од побарувачка за неговата професија.
Во оваа ситуација можете да се потпрете на фактот дека Игор може да работи нешто друго. Важно е да го охрабрете да бара какво било формално вработување. На пример, да работи за некој што е експерт во својата област, бидејќи често не сакаме да работиме за некого, особено ако тој некој е поинфериорен од нас по образование и интелигенција.
Поврзани објави
Дури тогаш ја сфаќаме важноста на дипломата.
Охрабрете го вашиот син и поддржете го во неговата потрага по соодветна работа. Секоја мала победа е добар знак. Разгледал неколку перспективни работни места? Отишол на интервју? Совршено! Сакате да научи нешто друго? Во ред, единствено што овој пат сам треба да заработи за обуката. Обидете се да не плаќате за неговата „листа на желби“.
Прашајте го какви му се плановите за иднината. За што сонува, кон што се стреми? Како си го гледа животот за 10-20 години? Корисно е да се направи потесен список на работни места.
Ако Игор навистина не знае што сака да работи, можете да ја проучите листата на образовни институции каде што би можел да се преквалификува (на негов трошок). Ако му се допадне тоа што ќе го научи, најверојатно ќе го реши прашањето со вработувањето.
Покажете му ги сите можности, но без долги предавања и лекции.
Текст: Убавина и здравје
