Сигурно сте имале моменти кога сте се погледнале во огледало и сте помислиле: „Дали сум грд/a?“ И потоа истото сте го потврдиле со „ Да, сум. “
Да бидеме искрени, сите сакаме да бидеме убави или згодни. Можеби тоа не е првото што го помислуваме во секојдневен живот, но тоа е нормално. Луѓето со векови бараат нови начини да ја подобрат својата физичка појава.
Во општество кое повеќе ги цени надворешните квалитети тешко е објективно да се согледате себеси.
Но кој е виновен?
Улогата на социјалните медиуми
Со секое отворање на апликација за социјални медиуми, се раѓа нова несигурност што луѓето ја наметнуваат. Или пак се потенцира нов физички квалитет за кој сите беснеат и го идеализираат.
Моментот кога влегувате на социјална мрежа се изложувате на видеа и слики од беспрекорна кожа, здрава коса и завидни тела. Со сите можности за обработка на содржината што се прикажува вашиот ум престанува да размислува за тоа кој навистина стои зад тој екран и колку вложува за да се прикаже во најдобро светло.
Доколку и вие истото време и труд го посветите на обработка на фотографии и видеа, можеби и вие би биле нечиј нереален стандард.
Имајте на ум дека, што и да е на тој екран, не го одразува реалниот живот, затоа не споредувајте се со личноста зад конкретниот профил!
Поврзани објави
Инфлуенсерство
Следите познати личности чија работа е да изгледаат совршено, прикажуваат производи и се обидуваат да ви продадат нешто. Иако постојат личности што се искрени со својата публика и покажуваат дека животот позади екранот не е толку розов, сепак често пати гледате познати личности зад кои стои цел тим. Шминкери, стилисти, нутриционисти, персонални тренери…
Има и такви кои платформата ја користат да продадат производ, па нудат решенија за побрзо слабеење, затегнување на телото, подобрување на кожата, косата и лицето. Кога сте изложени на сите овие решенија за подобрување, почнувате да се запрашувате што можете да смените кај себе за да изгледате подобро. А на тој начин почнувате да наоѓате повеќе маани кај себе.
Алгоритам
Тема на дискусија во последните години беше дека социјалните мрежи и нивниот алгоритам ги истакнуваат луѓето со пријатни карактеристики. Прашање е дали одредени јавни личности и креирачи на содржина се талентирани или едноставно имаат корист од алгоритмот.
Не е јасно точно како алгоритмот ја „оценува“ привлечноста на поединецот, но ја нагласува важноста што општеството му ја дава на физичкиот изглед. Атрактивното лице е поверојатно да добие повеќе прегледи едноставно затоа што е пријатно за гледање. Имајќи го тоа на ум, многу е можно тие влијателни лица на вашата страница за вас да не се просечни, туку да се несразмерно претставени.
Дали вие се согласувате дека во денешно време, социјалните мрежи влијаат негативно на нашата самодоверба?
